香港消失的味道

去灣仔睇show ,最麻煩就係搵食，唔係太遠咩，就係無位，難得就近會展開咗一間新嘅茶餐廳，食物質素一般啦，勝在有位夠快，商場內嘅洗手間勁靚，節省咗去會場排隊去廁所嘅時間😂

久違了的 cafe landmark ,裝修完之後，重新開業。服務水準同以前一樣，食物最出色嘅係龍蝦，可惜我只係食咗公司三文治😂， 因為龍蝦係喇沙口味，我唔想返香港食喇沙😂😂😂 可惜裝修咗之後我覺得冇以前咁靚，但座位就多咗，我諗好多人都唔知佢其實係美心集團轄下嘅其中一間餐廳

打邊爐已經係香港人生活嘅一部份，大時大節唔想訂位就係去打邊爐，情人節打邊爐，冬至打邊爐，聖誕節梗係打邊爐啦，連除夕倒數都係打邊爐。香港嘅火鍋店真係百花齊放，呢間店火鍋同刺身都係高質素，性價比仲好高。 一間火鍋店得唔得，一定要睇佢賣嘅牛肉，彼 俾得呢粒星星，佢嘅牛真係OK，仲有我最愛嘅牛胸爽添🤣，脆骨腩-爽，響鈴-即炸即食，午餐肉-煎到燶邊，仲有梅菜肉丸 ，佢真係俾埋鹹蛋黃我㗎。稻庭烏冬我哋叫咗10個🤣，唯一美中不足嘅係上菜慢咗啲，又或者係我哋食得太快😂

正所謂去玩去癲黎Ocean Park，闊別10幾年嘅海洋公園之水上樂園終於重開，黎呢度玩已經係上個世紀嘅事，難得今次一班姨甥同我一齊黎玩。水上設施大喇叭（急流漩渦），沖天瀑布一個一個咁玩完，把聲已經叫到喉嚨乾涸，好彩園內有一間餐廳可以補充水份同體力，食物正常啦，價錢一定係貴㗎啦，但尚可接受，由朝頭早玩到傍晚，無論如何你都會喺度消費。 PS 真係抵玩，過咗暑假門票仲有七折，但係唔係好多人去，好多活動排10分鐘20分鐘就可以玩。香港經典

好彩今日飛機冇delay，趕得切last order PS香港夜景真係好靚

牛脷

如果要食蛋撻，我會去返小店食，唔使排隊，未試過嘅都可以一試。

中環不錯的餃子店選擇， 湯也不錯的

D 豬扒多到見唔到d 飯 PS 2:30 pm 到， 見到門口掛住個close ,心暗暗一沉。 好彩阿姐開門，見我哋兩個人，話最後剩返兩份咖喱炸豬扒，我哋話我哋就係黎食豬扒， 休市前最後食客， 仲可以加杯凍奶茶😆

因為朋友打過卡，咁啱又喺附近，咁就諗住入嚟食個晚餐啦！點知5:45pm入到黎，仲有下午茶餐食，喺香港識食梗係食下午茶啦！包埋餐飲，只係69蚊，抵食呀👍🏻 多謝 @Pilar 推薦， 正呀❣️

喺香港，我最鍾意食下午茶餐

愛上了

味道不同了

掛住四寶河， 所以黎咗

一返到黎，連人帶行李即刻衝去食🤣

如果唔係工作關係，應該唔會嚟到呢間餐廳。顧名思義Krug room,招待嘅一定係香檳之王Krug . 我好少飲香檳，基本上唔係好鍾意飲，但同Krug 同Ruinart 係例外嘅 呢間餐廳係喺文華酒店内，只做Private dinner, 最多只可以坐12-15 個人。隨着季節有唔同嘅裝飾，Menu亦都會有唔同嘅變化。 如果係一啲好特別嘅慶祝，係一個不錯嘅選擇 除咗貴，佢應該冇缺點

機場竟然出手沖咖啡，最啱就係我依啲黎到機場先被通知航班delay嘅人嚟試啦，我已經行晒成個Terminal 1啦，幾時可以上機啊？我要返屋企呀，我聽日要返工啊😭

今日晨雞咁早，山長水遠咁嚟，就係為咗去一間月下文具店。文具店之後先慢慢介紹。 反而，文具店老闆介紹咗我哋嚟呢度飲咖啡，呢間係一間單車舖，但係佢有黑膠唱片流聲機，再加兩個古典大喇叭，可以媲美教堂嗰隻喇叭，啲音色出嚟真係完全唔同，仲好聽過新加坡戲院嘅杜比音響 環境好舒服，可以飲咖啡，又有輕食。佢部咖啡機，係好似油壓機咁，要大大力拉落去壓綷咖啡裏面嘅香味，非常之專業。一定要係一個好有品味，又好欣賞咖啡，仲要係聽黑膠唱片嘅人，先會開一間咁有品味嘅小店

真係好鐘意餃子，原本諗住食荃灣鎮區之寶餃子店，因為好多人要排隊，一早11點幾到，點知佢貼咗張紅紙話要回鄉祖，我聽到我個心碎咗一下💔,已經check晒 開門時間，點知都中😓 塞翁失馬焉知非福，喺隔籬發現咗一間齋舖經營有雪糕賣，好食，呢個一陣間再講 好彩做定功課，呢邊仲有一間甜記餃子，因為之前食過，所以諗住試新嘢，既然來都來了，就過嚟食餃子啦。佢嘅西洋菜餃係真係冇得輸，再嚟一客京蔥羊肉煎餃，再試佢嘅新嘢忌廉雞肉餃，正呀！

我真係好鍾意佢哋嘅牛扒腸仔早餐，最緊要就係要加埋個橙色嘅醬。因為呢個餐，搞到我新加坡曾經home sick 過🤣 以前細個有得出街食飯，最期待就係阿爸阿媽帶我哋去食大家樂，最鍾意佢哋嗰個鐵板餐，係拎個醬倒落去個熱辣辣嘅鐵板上面會出煙嫁，如果嗰日乖嘅話，老竇就會買多個酥皮海皇湯俾我，好高級㗎，因為加酥皮要加$10 㗎，真係好貴嫁。 但係而家啲細路物質已經豐富咗好多，帶佢哋嚟食大家樂，佢哋只會係當一個快餐。 突然記起一個搞笑野，因為呢一個英文名，曾經差啲搞到我econ 測驗唔合格。好地地叫大家樂咪大家樂，測驗出英文名Cafe de Carol鬼知係咩黎。當時都嬲咗個阿Sir一陣間🤬

一個年代的回憶

想試豬油渣撈粗，豬油渣撈麵 啓德地鐵站

想試： 厚切牛舌 大埔地鐵站 支援 大埔火災的小店 人情味

想試： 蠔餅，小炒皇 大埔地鐵站 大埔火災提供免費飯盒

想試 雙檸手撕雞丸，涼瓜豬肉丸，胡椒豬肚丸，鯪魚球 上環地鐵站

我又黎啦，真係好好食😋 今晚仲要嚟一個糖水buffet，大癲🤪

買小見小的老派茶餐廳，要先登記取籌再排隊入座，如果唔係你排幾耐都冇位坐㗎 蛋撻一定要試，熱辣辣加埋奶茶，正呀！ 雞批都唔錯，菠蘿油怕肥可以唔要牛油

年初二一定要做嘅嘢，拜車公，路路亨通！ 開年大吉 車公廟附近嘅紅茶，廣式茶餐廳都OK喎，最緊要係新年都開嘛👍🏻

一個人其實有幾多身份呢？大眾認知都應該只係學生啦，打工仔，阿媽個女。但一到咗新年，你就會出現身份認知嘅障礙，首先你會由一個打工仔變返做人哋個女，阿媽要你幫手準備所有新年過節嘅嘢。好快你就會變返人哋嘅家嫂，奶奶會招喚親朋戚友叫家嫂嚟幫手應酬，到咗新年正日，你就會變返人哋個老婆，大廈看更叫你咩太咩太，笑口噬噬咁同你講新春大吉逗利是，但其實有好多你都係唔識嫁。之後見到姨甥姪仔呀，又會變返做阿姨同嬸嬸，一日嘅身份轉換，有時我都唔記得咗自己係邊個😆 今日黎sogo 係黎求糕，大師姐嘅薑汁年糕係我新年一定要食㗎，已經有六年冇食過，今年冇預訂，賣晒🙄花咗好多唇舌，先從賣糕阿姐手中買到一個，祝大家馬年行大運

今次買黎做晚餐

作為電視界嘅KOL，屋企所有電視設備都要站在時代嘅最尖端，所以每年深水埗黃金都係一定要去潮拜嘅地方，更新屋企需要嘅設備😆 每次嚟到深水埗，公和同樹記就必去㗎啦，另外仲有一個糖水舖喺呢間綠林。佢除咗中式糖水之外，仲有西式糖水跟返潮流，但都係中式嘅糖水比較出色，嚟呢度綠豆沙同桑寄生係我必然嘅選擇，反正公和都唔會食得飽，食兩碗糖水唔太過分啦，我都未食埋馬蹄露😆

喺星加坡見shop House就見得多，香港真係好少見，行去深水埗，咁啱見到有咖啡舖就入去飲杯咖啡，估唔到真係臥虎藏龍（真係有龍嫁， 附圖）見到依一間shop House，非常之有特色，樓上係賣咖啡精品，樓下買咖啡同小食。同一般文青咖啡不同，嚟嘅都係一些粗獷型嘅男士，應該係附近嘅店主，店內有手沖咖啡如果有時間行過嘅都可以不妨一試

石硤尾，應該一般人都好少去。以前細細個成日嚟，因為阿婆同阿公住喺附近，地鐵都好難去，佢哋住喺深水埗同石硤尾中間，叫元州邨而家都拆咗了。 細個去阿婆度，大人就好努力攻打四方城，細路就跟啲大表哥表姐落公園玩，好記得玩嘅係無敵風火輪，即係將氹氹轉瘋狂地旋轉，轉到你只係睇到入面嘅人嘅殘影，只要你一日唔跌出嚟你就有機會贏，諗起都好好玩🤣 呢間餃子店，五年前COVID嘅時候已經想食，但當時都係要排一個鐘頭先有得入去，所以放棄咗。估唔到等咗五年，佢開多咗間分店，終於都唔使排隊。餃子同湯底都好食，但最重要嘅係要食佢嘅芝士蛋糕，好彩有高人指點，又好彩佢哋肯聽電話，俾我留咗最後兩嚿芝士蛋糕俾我仲要有開心果味，正👍🏻

機場開咗正斗之後，每次飛之前嘅一餐，一定會食佢。今次由於的士司機快到無倫，由油塘過到嚟機場只係用咗五個字，目測佢嘅車速係同機場快綫睇齊，因為架列車就喺我隔籬，我哋係同步㗎，如果唔係前面仲有其他車，我應該係可以快過機場快綫🤣。所以話香港的士司機，真係世界第一👍🏻 時間非常充裕，所以今次叫咗個鯪魚煎釀青椒，超正。又係時候去shopping啦。

聖誕假期終於轉冷， 最好就係燒嘢食。 面對無敵大海景， 又有夕陽相伴， 環境一流 👍🏻

Merry Christmas 🎄 終於飲到聖誕特別版Ginger bread Lattle 好鍾意聖誕喺香港，冇咩人㗎，全部出晒去旅行😆 Starbucks同地鐵都有位座㗎🥳🥳

紅豆沙， 細個真係唔係好鐘意食， 情願食芒果冰沙，楊枝甘露。 但人越大， 就越鐘意果皮的香味， 就好似半生瓜一樣， 要大咗之後先識得欣賞。 每次返親香港一定會嚟呢度食一碗新會遠年陳皮紅豆沙，真係外面食唔到， 自己又煲唔到。 除咗呢間，我都一定會去一次覓.甜，個邊好似出咗新款，搵日去試吓先

此文不對題 天堂天堂天堂， 數碼港由食物沙漠變為有餐廳可以選擇， 簡直難以置信 金記原本係我飯堂， 味道ok 啦， 主要係因為2:30有下午茶，而下午茶係買返午餐嘅嘢，但打8 折，即係麥兜話齋常餐咪就係午餐，午餐咪係下午茶囉，下午茶咪即係食返早餐咁囉，識食，梗係食下午茶啦！ 今日返嚟，竟然俾我見到food court有譚仔同埋日本餐廳，黐線㗎 ！以前有個流動午餐盒vending Machine已經覺得係打工仔恩物，後尾仲開咗鴻福堂，已經開心到上天。而家仲要有埋譚仔，仲有Pacific coffee ,仲唔係天堂 由於今日已經決定食茶餐廳，所以譚仔明天再續

數碼港，如果唔係返工，以前無乜人會專登走入嚟。係到返工最開心嘅就係戲院睇戲一定有位，唔使同人爭。另外就係放工嘅時間幸運地遇到太陽落山，我一定會搭巴士， 坐係上層，望住斜陽餘暉灑落喺蔚藍色嘅海面上，金光閃閃，可以將一日嘅苦悶掃除。 而家就唔同晒啦，返工嘅車又多咗，餐廳又多咗，真係方便咗好多，人亦都多咗好多。今日試譚仔，專登等到有下午茶，2:30先食lunch，有我最愛嘅蒜蓉腩肉同土匪雞翼加埋凍檸茶少甜， 只係hkd41真係好抵食，所以話識食嘅，喺香港一定食下午茶🤣

山頂，應該每一個嚟香港旅行嘅人都會嚟 到。但未必會有人嚟呢邊的餐廳食飯。以前嘅山頂有好多選擇， Cafe Deco，同Peak lookout 係山頂兩大王牌。如果要睇景Cafe Deco肯定係首選，Peak lookout 就係食佢哋嘅環境。 餐廳係位於一個好有歷史嘅建築物裏面，食嘅係西餐水準不錯，環境清幽好多外國人喺平日上嚟遊覽時都會喺度食個brunch或者下午茶。有機會可以一試 可惜嘅係Cafe Deco已經執咗，呢個味道已經消失咗了

第一次嚟係因為同學搞活動，訂咗圍村菜，點知入到圍村發現同學訂錯日子，入到圍村餐廳話煮唔切叫我哋聽日再黎，搞到大家好掃興。好彩有人提議出嚟食豬油撈飯，咁先叫冇白行一趟。 印象中豬油撈飯都好食，亦都冇想像中咁油膩，但餐廳裏面有很多傳統菜，雞， 魚都好食，但印象最深嘅反而係總廚韜哥肥胖嘅身形

呢間美心出名飲茶，仲有見到點心車。啲阿姨推住架車仔出嚟，新鮮熱辣辣，應該好多人都未試過🤣

細細個就識得大家樂同大快活，佢哋原本係兩兄弟後來家變成兩間公司。大家都係快餐我最鍾意就係喺大快活食早餐。黑椒牛扒腸仔加熱奶茶變成早餐日常。而佢個劈橙色汁，簡直係呢個早餐嘅靈魂。 鍾意嘅唔係因為佢特別好食，基本味道其實好普通，食嘅係一種回憶，係對屋企嘅一種懷念。因為星加坡有宗教嘅原因，好多食肆嘅腸仔都係雞肉，唔係豬肉。而家大快活嘅脆皮腸反而變成一種家的感覺。 返親香港，都會返去食一次 一諗起，而家都好想食添🥲

德福廣場其實真係好少去，如果唔係為咗去一個附近商廈，真係未必會過嚟。香港係一個商業化嘅城市，傳統手藝基本上已經冇乜生存空間，粵東磁廠係一間非常傳統而且仲有手繪老師傅喺店內繪畫瓷器嘅舊式店舖。呢種手藝，其實就好似日本匠人，真係越嚟越少，識得欣賞嘅人唔多，肯俾錢購買嘅就更少。好希望呢個手藝能夠一直存活，亦都喺香港本土產物嘅一個代表。有機會嚟香港玩嘅朋友，可以買一些返屋企當手信啦，就好似去日本買杯杯碟碟一樣囉😂 好啦講返錦麗先，佢哋嘅生牛肉河粉真係唔錯，有時肚餓嘅話仲會叫碗火車頭大大份咩都有。難得係個湯底非常濃郁，飲完之後都唔需要飲太多水，味精就僅有㗎啦，不過唔多囉。都算大份夾抵食㗎。

講開書店，上次有機會去咗一個我鍾意咗好多年嘅作家自己開嘅書店。呢間書店係不對外公開，只能預約。如果冇約嘅就只能碰運氣睇吓店主有冇開門。書店都係喺商業大廈入面，應承咗店主地址就不方便公開啦。好喜歡裏便嘅環境，賣嘅書亦都唔係出邊一般嘅書籍，全部都係店主喜歡嘅書籍，亦有店主生活上的精選推介。喺佢推介下都買咗5本，搞到行李過重😓 估唔到行完書店已經日落，足足玩咗3個鐘。原本打算去長沙灣食餃子，因時間關係去唔到了。店主推介呢間。試過之後非常喜歡他們的和牛餃子，和牛不漏餃子內掛有湯汁，味道非常出色。下次有緣嘅時候再去書店，都會再嚟試多次。 PS 店主文筆一向鋒利， 果然人如其文，深得我心🤣

中環附近有間書店-大業藝術書店，每次出開嚟都會上去睇一睇，書店係商業大廈裏面一啲都唔顯眼，唔識嘅人根本搵唔到。但係佢係香港碩果僅存還有刻印章服務嘅店舖。老闆都上咗年紀，一個文質彬彬好有書卷味，另一位從佢魁梧嘅身形真係好難想像佢係篆刻高手。每次去到都會打下書釘， 老闆也好有默契地不打擾客人。 打完書釘， 就會去呢間中環老式小店，舖頭好細，基本上只能企喺度食。好多人嚟都係為咗佢嘅熱狗，熱狗分兩種，單腸或者係孖腸，人大咗有能力了而家嚟親都會食孖腸。坦白講熱狗真係一般，食嘅係佢嘅歷史同人情味。主要係個麵包烤得脆脆的，奶茶都不錯。下午茶時間呢度不失為一個中環區經濟選擇

曾經喺大埔返工一段時間，因為公司係工廠區每次食飯都要搭公司shuttle, 每次時間都好趕，但係有時為咗食呢個阿婆豆腐花，趕唔切搭shuttle,會揀搭的士返公司，真係為咗食豆腐花，你可以去到幾盡😆

呢間真係香港人嘅平民飯堂，本身食物質素係OK嘅，估唔到坊間餐廳打出名堂嘅係佢哋啲服務員阿姐，佢哋用一口唔鹹唔淡嘅廣東話，成功打通咗香港人嘅心。一碗墨演米，檸檬茶少田少冰，成為香港人津津樂道嘅一間小店。 但本人最鍾意嘅係土匪雞翼，同埋蒜泥白肉多蒜泥。可惜呢個只能夠星期六先食，因為食完之後要用兩日嘅時間去除口臭

難得有時間同兩老一齊飲飲茶，就帶佢哋嚟香港老字號酒家，呢間酒樓既月餅係每年成城中的搶手貨，曾經係一餅難求，絕對係要識人先可以買到。 兩老知道要來飲茶，當然梗係話唔好，話太貴啦，但係睇得出佢哋真係好開心。正所謂辛苦搵嚟志在食，見到兩老高興，咩都係值得㗎啦！ 點心都係一些老式點心，配上精緻嘅外型，水準是一定有，值得一提的是陳皮紅豆沙和馬拉糕，做得比一般點心更好，點讚！

返香港的第一餐， 冇錯， 我係食麥記。 我好掛住個煙肉蛋漢堡呀

今次試甜品， 我最愛的開心果

長沙灣以前係一個美食沙漠，自從有咗D2呢啲新商場後，多咗好多好多餐廳，為呢一區嘅打工仔，增添咗好多返工的動力。 商場地下一兩層有好多精品店，再上就有餐廳同埋士多，裏面會賣香港嘅小食，譬如手沖奶茶茶膽， 有晒說明書， 沖出嚟嘅味道係真係茶餐廳咁，當然你係要買返黑白奶黎沖啦！ 呢間烤肉店係，係連日本人都話正👍🏻menu有厚切牛脷，仲有好多牛嘅不同部位，價錢中上，如果要過嚟買嘢，喺度食埋餐飯真係幾開心㗎！ PS , 樓下有間手沖咖啡 - coffee galaxy， 我係嗰度第一次試到雲南咖啡，真係冇諗過雲南除咗茶葉之外，仲有咖啡出品,仲要味道唔錯，呢個唔係咁起眼嘅商場，竟然臥虎藏龍🐯🐉

葵廣(葵涌廣場),真係只有香港人先會識佢。佢裏面係一個迷宮，包括好多個細商場，一站式幫你搞掂眼耳口鼻，衣着鞋襪手飾，仲可以買埋零食文具精品同家電。疫情開始後好多舖頭轉為小食店，你諗到同諗唔到嘅世界美食大部份都可以喺度搵到，仲要係好食平民價。 而我始終最鍾意嘅都係呢間賣牛雜嘅舖頭，豬天梯就聽得多， 牛脆骨你又知唔知？佢係牛的喉嚨，好爽脆， 一隻牛得好少同埋好多時都會俾酒樓餐廳預訂咗，係好難搵到嫁 。佢竟然有，但係都唔係次次買到㗎，睇你嗰日好唔好彩啦😛

車仔面，呢個真係由細食到大的食物。以前一碗面三個餸加杯飲品， 廿蚊唔駛， 有能力嘅仲可以凍飲加兩蚊，真係學生恩物。就係咁，出嚟做嘢之後反而小食咗好多。 人在外，就好想食返呢啲以前嘅味道。原來喺香港以外想食車仔麵係好難㗎，想食好食嘅車仔麵係更難。所以返親香港，有機會我都會嚟食，整個四餸雞翼尖，魷魚，蘿蔔，豬皮，粗麵加腩汁，再加返杯凍檸茶小甜小冰，食嘅就係回憶的味道。

細個時係鐘意食雲吞多d , 人大咗，漸漸開始鐘意食餃子， 可能餃子的變化多， 又可以韭菜， 又可以白菜， 豬肉/羊肉/海鮮任均選擇，去開一定買幾盒放係屋企香門口。 重點黎啦 ， 佢呢度糯米糍係超級好食， 仲要站係潮流尖端， 第一批出開心果糯米糍的店舖， 一啖咬落去， 開心果係多到爆出黎， 作為開心果迷嘅我， 真係極度欣賞。 佢仲有好多口味,花生, 黑芝麻都係我至愛❣️

近期返香港機場，一出入境大堂都會過嚟買返啲宵夜。真係好鍾意佢哋嘅素鵝，雞腳筋，鴨舌，今日仲可以加埋鵝紅，正呀 PS 竟然喺到撞返一個10幾年冇見嘅同學，同學個仔都小學了，但係最正嘅係我哋一見到對方，竟然係可以開到對方嘅全名，呢啲真係真同學嘅表現🤣所以話機場真係一個見證悲歡離合嘅地方，係最多故事嘅地方。

長沙灣-係呢個區做過幾年嘢，真係美食沙漠，後來搵到一份尖沙咀海港城嘅工，憧憬住日日踩住三吋高踭鞋，攞住杯Starbucks返工的日子。 點知唔夠一年，公司話要搬去甲級寫字樓，原來係去長沙灣，正正係我舊公司對面😮‍💨 講返餃子， 要足料新鮮就不在話下，佢個湯頭係老火湯， 一次過食打半冇難度啦

生滾粥係由一碗白粥底再加上自選配料再用大火滾成的一碗粥。 唔記得由幾時開始，去飲茶一定會叫一碗生滾粥全家人一齊分。 呢度的粥可以話係香港數一數二， 如果鐘意食魚的話，一定要試佢哋嘅魚腩粥，再加返個炸兩， 咁又係一餐美食。 好懷念佢的味道

鍾意食牛嘅朋友，鍾意打邊爐嘅朋友，鍾意食牛白肉嘅朋友，一定要黎食呀

無論喺九龍城食都幾飽， 都一定會去的甜品店， 呢度嘅潮州糖水，喺出邊搵唔到㗎

九龍城的泰國餐廳實在各有千秋， 呢間係我食過其中一間會飽到頂住個肚嘅泰餐。 喺香港食嘅泰國生蝦，比泰國食嘅生蝦簡直有過之而冇不及

九龍城美食太多， 樂園沙嗲牛肉西多士，紅豆冰，係美食家必試佳品👍🏻

黎到九龍城， 點都要食一個牛肉餅 。外賣企係街邊即食

長洲必買手信，平安包賣到成位香港名物。 但係我反而鐘意佢d 傳統手工餅

長洲係一個好特別的小島， 離市區45分鐘船程。 小島上人情味特別濃， 街坊街厘都係認識嘅， 小島上餐廳不多賣嘅都係人情味。 曾經鐘意呢個小島的情度係高到想係呢度置业。 呢間菜餐廳係入嚟玩時不錯嘅選擇

以前係尖沙咀返工， 閒時就會黎食碗淨牛丸， 重點要配佢嘅潮洲辣椒醬。 係隔離茶檔叫返個瓦煲奶茶， 月頭有能力嘅話再加多個炸豬排包， 真係諗起都開心

可能期望太高， 性價比唔係太高

蕃茄麵好多茶餐廳都識做， 但呢間係蕃茄麵嘅始祖， 位置係斜路樓梯旁的鐵皮屋，能夠令我喺夏天30幾度嘅高溫之下，都係街邊排20分鐘搭枱食嘅， 你話唔係好食到出面食唔到嘅， 我會唔會去丫。 奶油脆脆，鹹檸七簡直係絕配

近期食過會令我念念不忘嘅中餐廳， 蔥油雞真係好好食， 燒白鱔更係一絕， 又心思思好想返去食😛

你講得出的傳統甜品， 係度都會搵到

唔好去錯呀 ， 呢間先係正貨。 佢嘅咖喱真係好好食， 其他地方食唔到， 亦係我細個時媽媽跟外藉鄰居學識煮的咖哩味道， 因為太複雜， 而家只能係呢度食返媽媽的味道

係香港， 冇一個香港人會唔識佢地。 賣點除咗係個炒蛋同杯奶茶，最重要係食佢班伙記的態度同速度。 你試下佢地埋黎落單嘅時候要諗丫， 單都唔幫你落🤣 除非你想俾人黑面啦， 唔想嘅話15 分鐘你好食完個餐啦 update： 今日又有人挑戰d 伙記啦，問點解啲炒蛋出得咁快？ 夥計回答「同你條命一樣，整定㗎 」態度完全符合品牌嘅DNA👍🏻完勝

呢個係去筲箕灣必食的， 燒白鱔係由我中學食到而家結咗婚，搬咗去九龍都要專登返去食的串燒， 等雞蛋仔時就過嚟呢邊買埋串燒， 正呀喂

可以話係香港最好食嘅雞蛋仔， 排20-30分鐘， 算快啦

筲箕灣最好食嘅魚蛋， 其實係呢間🤣

你以為我黎食魚蛋咩， 錯啦， 最好食嘅成佢嘅蝴蝶腩， 同鮮牛油多士。 諗起我而家都想食

靠一個鹹蛋肉餅山做到開分店， 你話好唔好食丫

以前係要大時大節， 爸媽才會帶我哋黎食的港式西餐， 係平民心目中的高級餐廳。 名菜：瑞士汁雞翼，乾炒牛河，巨型疏乎厘係節日必食。

香港四大才子都鐘意黎食飯， 杏汁豬肚湯係古早的味道。 入嚟食飯， 好易撞到名人

變成了俗不可耐， 劏客的餐廳😭

作為香港第一的餐廳， 食物真係冇得彈。 訂枱的難度可以話係識人好過識字。 能否食到， 隨緣吧